2010-10-22
មន្ត្រីជាន់ខ្ពស់ក្រសួងការពារជាតិកម្ពុជា បានបំភ្លឺនៅថ្ងៃទី២២ ខែតុលាថា សម្ភារៈយោធា ដូចជារថយន្តយោធា រួមទាំងគ្រឿងបរិក្ខារពេទ្យ ដែលកម្ពុជាទទួលបានពីប្រទេសកូរ៉េខាងត្បូងថ្មីៗនេះ គឺជាជំនួយឥតសំណង សម្រាប់ប្រទេសក្រីក្រដូចជាកម្ពុជាជាដើម តាមការស្នើសុំរបស់កម្ពុជា កន្លងទៅថ្មីៗនេះ មិនមែនជាការទិញដូរនោះទេ។ ជំនួយទាំងនោះត្រូវបានដឹកតាមកប៉ាល់ទឹកមកដល់ប្រទេសកម្ពុជា កាលពីប៉ុន្មានថ្ងៃមុននេះ។
ឧត្ដមសេនីយ៍ឯក លោក ឈុំ សុជាត ជាមន្ត្រីអ្នកនាំពាក្យក្រសួងការពារជាតិកម្ពុជា បានមានប្រសាសន៍ប្រាប់វិទ្យុអាស៊ីសេរី នៅថ្ងៃសុក្រ ទី២២ ខែតុលាថា សម្ភារៈយោធាទាំងនេះ គឺជាសេចក្ដីត្រូវការចាំបាច់របស់កងយោធពលខេមរភូមិន្ទកម្ពុជា នៅក្នុងនោះមានរថយន្តយោធា សម្ភារៈ វិស្វកម្ម និងកប៉ាល់ប្រដេញ សម្រាប់បង្ក្រាបបទល្មើសនេសាទខុសច្បាប់ និងបទឧក្រិដ្ឋនៅក្នុងដែនសមុទ្ទ ដូចជាបទល្មើសរត់ពន្ធគ្រឿងញៀនជាដើម។
លោកបន្តថា ៖ «សាធារណរដ្ឋកូរ៉េខាងត្បូង ដែលបានជួយចំពោះការខ្វះខាតចំពោះមុខនៃកងយោធពលខេមរភូមិន្ទរបស់យើង នេះ ដើម្បីបំពេញភារកិច្ចការពារជាតិមាតុភូមិ។ យើងគិតថា យកសម្ភារៈទាំងអស់នេះ ដើម្បីប្រើប្រាស់នូវប្រយោជន៍ ពង្រឹងនូវសមត្ថភាពរបស់កងយោធពលខេមរភូមិន្ទរបស់យើង»។
លោក ឈុំ សុជាត មិនបានឲ្យដឹងជាពិស្ដារទេ អំពីចំនួនជាក់លាក់នៃសម្ភារៈយោធាទាំងនោះ ប៉ុន្តែសេចក្ដីរាយការណ៍មួយចំនួនបានឲ្យដឹងថា សម្ភារៈយោធាទាំងនោះមាន ៣ប្រភេទ ដូចជាកប៉ាល់ប្រដេញចំនួន ៣គ្រឿង រថយន្តយោធាចំនួន ១០០គ្រឿង រថយន្តវិស្វកម្មចំនួន ២៤គ្រឿង និងបរិក្ខារពេទ្យមួយចំនួនទៀត។
មន្ត្រីដដែលបានឲ្យដឹងថា ក្រសួងការពារជាតិកម្ពុជា កំពុងតែស្វែងរកជំនួយយោធាមួយចំនួនទៀតពីប្រទេសជាមិត្ត ដើម្បីបំពេញតាមសេចក្ដីត្រូវការនៃកងយោធពលខេមរភូមិន្ទកម្ពុជា។
ប្រធានគណបក្សសិទ្ធិមនុស្សនៅកម្ពុជា លោក កឹម សុខា បានមានប្រសាសន៍អត្ថាធិប្បាយថា សម្ភារៈទាំងនេះមានសារប្រយោជន៍ទៅបាន អាស្រ័យលើឆន្ទៈនៃការប្រើប្រាស់ ៖ «តែបើយកមកសម្រាប់តែបាញ់ប្រជាពលរដ្ឋយកដីយកធ្លី អាហ្នឹងអត់មានប្រយោជន៍ទេ។ វាអាស្រ័យលើអ្នកដែលប្រើប្រាស់»។
កាលពីខែកញ្ញា កន្លងទៅនេះ ប្រទេសកម្ពុជា បានទទួលរថក្រោះ និងរថពាសដែកសរុបចំនួន ៩៤គ្រឿង ពីប្រទេសនៅអឺរ៉ុបខាងកើត ដើម្បីយកមកពង្រឹងសមត្ថភាពក្នុងវិស័យយោធានៃកងយោធពលខេមរភូមិន្ទ កម្ពុជា។
មុនពេលប្រទេសកូរ៉េខាងត្បូងផ្ដល់ជំនួយសម្ភារៈយោធាខាងលើនេះ គឺប្រទេសចិន ក៏ធ្លាប់បានផ្ដល់ជំនួយរថយន្តយោធាចំនួន ២៥៧គ្រឿង និងឯកសណ្ឋានយោធាចំនួន ៥ម៉ឺនកំប្លេ កាលពីខែមិថុនា កន្លងទៅ មកឲ្យក្រសួងការពារជាតិកម្ពុជា។
ប្រទេសកម្ពុជា ដែលបានធ្លាក់ក្នុងភ្លើងសង្គ្រាមអូសបន្លាយអស់ជាង ៣០ឆ្នាំ ហើយទើបតែងើបផុតចេញពីសង្គ្រាមនោះ បានស្វះស្វែងរកជំនួយយោធាពីបរទេសក្នុងរយៈពេលប៉ុន្មានឆ្នាំចុង ក្រោយនេះ ដែលនាំឲ្យមានការរិះគន់ពីមជ្ឈដ្ឋាននានាថា កម្ពុជាកំពុងត្រៀមការពារខ្លួនទប់ទល់ការឈ្លានពានរបស់កងទ័ពថៃ តែរដ្ឋាភិបាលកម្ពុជា បានបដិសេធ៕
ឧត្ដមសេនីយ៍ឯក លោក ឈុំ សុជាត ជាមន្ត្រីអ្នកនាំពាក្យក្រសួងការពារជាតិកម្ពុជា បានមានប្រសាសន៍ប្រាប់វិទ្យុអាស៊ីសេរី នៅថ្ងៃសុក្រ ទី២២ ខែតុលាថា សម្ភារៈយោធាទាំងនេះ គឺជាសេចក្ដីត្រូវការចាំបាច់របស់កងយោធពលខេមរភូមិន្ទកម្ពុជា នៅក្នុងនោះមានរថយន្តយោធា សម្ភារៈ វិស្វកម្ម និងកប៉ាល់ប្រដេញ សម្រាប់បង្ក្រាបបទល្មើសនេសាទខុសច្បាប់ និងបទឧក្រិដ្ឋនៅក្នុងដែនសមុទ្ទ ដូចជាបទល្មើសរត់ពន្ធគ្រឿងញៀនជាដើម។
លោកបន្តថា ៖ «សាធារណរដ្ឋកូរ៉េខាងត្បូង ដែលបានជួយចំពោះការខ្វះខាតចំពោះមុខនៃកងយោធពលខេមរភូមិន្ទរបស់យើង នេះ ដើម្បីបំពេញភារកិច្ចការពារជាតិមាតុភូមិ។ យើងគិតថា យកសម្ភារៈទាំងអស់នេះ ដើម្បីប្រើប្រាស់នូវប្រយោជន៍ ពង្រឹងនូវសមត្ថភាពរបស់កងយោធពលខេមរភូមិន្ទរបស់យើង»។
លោក ឈុំ សុជាត មិនបានឲ្យដឹងជាពិស្ដារទេ អំពីចំនួនជាក់លាក់នៃសម្ភារៈយោធាទាំងនោះ ប៉ុន្តែសេចក្ដីរាយការណ៍មួយចំនួនបានឲ្យដឹងថា សម្ភារៈយោធាទាំងនោះមាន ៣ប្រភេទ ដូចជាកប៉ាល់ប្រដេញចំនួន ៣គ្រឿង រថយន្តយោធាចំនួន ១០០គ្រឿង រថយន្តវិស្វកម្មចំនួន ២៤គ្រឿង និងបរិក្ខារពេទ្យមួយចំនួនទៀត។
មន្ត្រីដដែលបានឲ្យដឹងថា ក្រសួងការពារជាតិកម្ពុជា កំពុងតែស្វែងរកជំនួយយោធាមួយចំនួនទៀតពីប្រទេសជាមិត្ត ដើម្បីបំពេញតាមសេចក្ដីត្រូវការនៃកងយោធពលខេមរភូមិន្ទកម្ពុជា។
ប្រធានគណបក្សសិទ្ធិមនុស្សនៅកម្ពុជា លោក កឹម សុខា បានមានប្រសាសន៍អត្ថាធិប្បាយថា សម្ភារៈទាំងនេះមានសារប្រយោជន៍ទៅបាន អាស្រ័យលើឆន្ទៈនៃការប្រើប្រាស់ ៖ «តែបើយកមកសម្រាប់តែបាញ់ប្រជាពលរដ្ឋយកដីយកធ្លី អាហ្នឹងអត់មានប្រយោជន៍ទេ។ វាអាស្រ័យលើអ្នកដែលប្រើប្រាស់»។
កាលពីខែកញ្ញា កន្លងទៅនេះ ប្រទេសកម្ពុជា បានទទួលរថក្រោះ និងរថពាសដែកសរុបចំនួន ៩៤គ្រឿង ពីប្រទេសនៅអឺរ៉ុបខាងកើត ដើម្បីយកមកពង្រឹងសមត្ថភាពក្នុងវិស័យយោធានៃកងយោធពលខេមរភូមិន្ទ កម្ពុជា។
មុនពេលប្រទេសកូរ៉េខាងត្បូងផ្ដល់ជំនួយសម្ភារៈយោធាខាងលើនេះ គឺប្រទេសចិន ក៏ធ្លាប់បានផ្ដល់ជំនួយរថយន្តយោធាចំនួន ២៥៧គ្រឿង និងឯកសណ្ឋានយោធាចំនួន ៥ម៉ឺនកំប្លេ កាលពីខែមិថុនា កន្លងទៅ មកឲ្យក្រសួងការពារជាតិកម្ពុជា។
ប្រទេសកម្ពុជា ដែលបានធ្លាក់ក្នុងភ្លើងសង្គ្រាមអូសបន្លាយអស់ជាង ៣០ឆ្នាំ ហើយទើបតែងើបផុតចេញពីសង្គ្រាមនោះ បានស្វះស្វែងរកជំនួយយោធាពីបរទេសក្នុងរយៈពេលប៉ុន្មានឆ្នាំចុង ក្រោយនេះ ដែលនាំឲ្យមានការរិះគន់ពីមជ្ឈដ្ឋាននានាថា កម្ពុជាកំពុងត្រៀមការពារខ្លួនទប់ទល់ការឈ្លានពានរបស់កងទ័ពថៃ តែរដ្ឋាភិបាលកម្ពុជា បានបដិសេធ៕
