ថ្ងៃ ព្រហស្បតិ៍ ទី ១៨ ខែ វិច្ឆិកា ឆ្នាំ ២០១០
រាជធានីភ្នំពេញ ៖ ជំនួបរវាងសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ នាល្ងាចថ្ងៃទី១៧ វិច្ឆិកា គឺជាជំនួបលើកទី៤ បន្ទាប់ពីការជួបគ្នាបន្តបន្ទាប់ចាប់តាំងពីជំនួបក្រុងញូវយ៉ក សហរដ្ឋអាមេរិក ជំនួបនៅក្រុងប៊្រុចសែល ប្រទេសបែលហ្ស៊ិក ជំនួបនៅក្រុងហាណូយ ប្រទេសវៀតណាម ។ ទោះបីជំនួបបន្តបន្ទាប់មិនមែនជាជំនួបផ្លូវការសំរាប់ការចរចាពី បញ្ហាព្រំដែនក្តី ក៏ជំនួបនេះបានធ្វើឱ្យស្ថានភាពតានតឹងនានាលើវិស័យការទូតបានទទួល លក្ខណៈល្អប្រសើរឡើងជាលំដាប់ ទាំងស្ថានភាពផ្នែកសេដ្ឋកិច្ចរហូតដល់ស្ថានការណ៍ខាងយោធា ដែលតាមតំបន់ព្រំដែនធ្លាប់តែមានការប្រឈមមុខដាក់គ្នា និងធ្លាប់ប៉ះទង្គិចគ្នានោះក៏បានស្ងប់ស្ងាត់ និងធូរស្រាលឡើងវិញ។
ក្នុងជំនួបលើកទី៤នេះ តាមលោកកុយ គួង អ្នកនាំពាក្យក្រសួងការបរទេសមានប្រសាសន៍ឱ្យដឹងថា លទ្ធផលជំនួបរវាងសម្តេចតេជោនាយករដ្ឋមន្ត្រី និងលោកអាប់ភីស៊ីត នាយករដ្ឋមន្ត្រីថៃ កាលពីថ្ងៃទី១៧ វិច្ឆិកា ២០១០ គឺភាគីទាំង២បានឯកភាពគ្នា ៖
១-បន្តប្រើប្រាស់យន្តការដែលមានស្រាប់ដូចជាគណៈ កម្មការព្រំដែនចំរុះ និងគណៈកម្មាធិការព្រំដែនទូទៅដែលដឹកនាំដោយរដ្ឋមន្ត្រីការបរទេស និងរដ្ឋមន្ត្រីការពារជាតិ ហើយឱ្យមានកិច្ចប្រជុំផ្សេងៗជាទៀងទាត់ ។
២-កាត់បន្ថយភាពតានតឹងនៅតាមព្រំដែន ជាពិសេសចៀសវាងការប្រឈមមុខដាក់គ្នាផ្នែកយោធា ដោយពិនិត្យមើលលទ្ធភាពនៃការដកកងទ័ពពីតំបន់ព្រំដែន ។
៣-ពិភាក្សាស្ថានភាពពលករខ្មែរដែលកំពុងស្នាក់នៅធ្វើការក្នុងប្រទេសថៃ នាពេលបច្ចុប្បន្ន ។
៤-និយាយពីសកម្មភាពរៀបចំការប្រារព្ធខួបលើក ទី៦០នៃទំនាក់ទំនងការទូតរវាងប្រទេសទាំង២ ដែលនឹងប្រព្រឹត្តទៅនៅថ្ងៃទី១៩ ធ្នូ ខាងមុខនេះ ហើយស្ថានទូតថៃគ្រោងរៀបចំពិធីជប់លៀង និងសំដែងសិល្បៈផ្សេងៗ ។
៥-ព្រឹត្តិការណ៍វប្បធម៌សាសនា និងពាណិជ្ជកម្មកន្លងទៅថ្មីៗនេះ ភាគីថៃបានដង្ហែកឋិនទានចូលមកប្រទេសកម្ពុជា ហើយគ្រោងធ្វើបុណ្យផ្កាមកបន្តទៀត ។
ក្រៅពីនេះ ក៏មានការរៀបចំតាំងពិព័រណ៍ពាណិជ្ជកម្មថៃនៅកម្ពុជាផងដែរ ។
លោកកុយ គួង មានប្រសាសន៍ឱ្យដឹងទៀតថា ជាចុងក្រោយភាគីទាំង២សង្ឃឹមថា គណៈកម្មការចំរុះសភាថៃ នឹងអនុម័តឯកសារទាំង៣ របស់គណៈកម្មការព្រំដែនចំរុះ JBC ក្នុងនោះមានកិច្ចព្រមព្រៀងបណ្តោះអាសន្នដែលជាលទ្ធផលនៃកិច្ច ប្រជុំថ្នាក់រដ្ឋមន្ត្រីការបរទេសនៃប្រទេសទាំង២ ដែលធ្វើឡើងក្នុងឆ្នាំ២០០៨-២០០៩ កន្លងមកនេះ៕