ថ្ងៃ សុក្រ ទី ៥ ខែ វិច្ឆិកា ឆ្នាំ ២០១០
រាជធានីភ្នំពេញ ៖ លោកហោ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានសំដែងនូវការសោកស្តាយ ដែលសភាថៃកន្លងមកនេះមិនបានអនុម័តលើកំណត់ហេតុទាំង៣ នៃកិច្ចព្រមព្រៀងរបស់ JBC ធ្វើឱ្យការចរចាស្តីពីបញ្ហាព្រំដែនត្រូវអូសបន្លាយ។ លោកឧបនាយករដ្ឋមន្ត្រីបានថ្លែងដូច្នេះនៅក្នុងពិធីជួបសំណេះសំណាល និងស្វាគមន៍ចំពោះវត្តមានឯកអគ្គរាជទូតថ្មីនៃប្រទេសថៃ ប្រចាំកម្ពុជា កាលពីល្ងាចថ្ងៃទី៣ វិច្ឆិកា ឆ្នាំ២០១០។
លោក Prasas Prasasvinitchai គឺជាឯកអគ្គរាជទូតថ្មីនៃព្រះរាជាណាចក្រថៃ ប្រចាំព្រះរាជាណាចក្រកម្ពុជា ដែលគេរំពឹងថា ការផ្លាស់ប្តូរមន្ត្រីការទូតថ្មីនេះ គឺជាសញ្ញាវិជ្ជមាននៃទំនាក់ទំនង និងកិច្ចសហប្រតិបត្តិរវាងប្រទេសទាំងពីរ បន្ទាប់ពីមានការប្រេះស្រាំកន្លងមក បណ្តាលមកពីភាគីថៃបានបញ្ជូនកងទ័ពចូលឈ្លានពានប្រទេសកម្ពុជា ក្នុងអំឡុងឆ្នាំ២០០៨។ នៅក្នុងជំនួបនោះ លោកឧបនាយករដ្ឋមន្ត្រីបានប្រាប់មន្ត្រីការទូតថៃថា កម្ពុជាមិនចង់បានទឹកដីប្រទេសណាមួយ សូម្បីមួយមីល្លីម៉ែត្រ ប៉ុន្តែកម្ពុជាក៏ចង់បានដំណោះស្រាយបញ្ហាព្រំដែនជាមួយប្រទេសជិត ខាង ដោយសន្តិវិធី សហប្រតិបត្តិការ និងគោរពតាមផែនទីដែលទទួលស្គាល់ជាអន្តរជាតិ។
លោកឧបនាយករដ្ឋមន្ត្រីហោ ណាំហុង ក៏បានលើកឡើងផងដែរអំពីការជំរុញបើកច្រកស្ទឹងបត់ឱ្យបានឆាប់ រហ័ស ដើម្បីផ្លាស់ប្តូរពាណិជ្ជកម្មរវាងប្រទេសទាំង២ ដោយទុកច្រកប៉ោយប៉ែត សំរាប់តែភ្ញៀវទេសចរឆ្លងកាត់ប៉ុណ្ណោះ។ លោក Prasas Prasasvinitchai បានលើកឡើងថា ទំនាក់ទំនងរវាងប្រទេសទាំងពីរ នឹងបានល្អប្រសើរជាបណ្តើរៗឡើងវិញ ហើយសំរាប់ប្រទេសថៃក៏កំពុងតែត្រៀមរៀបចំរំលឹកខួបលើកទី៦០ នៃចំណងសាមគ្គីភាពរវាងប្រទេសកម្ពុជា និងប្រទេសថៃ ដោយរៀបចំជាពិធីជប់លៀង និងការសំដែងសិល្បៈផ្សេងៗ។
លោកបញ្ជាក់ថា នៅថ្ងៃទី១៤ វិច្ឆិកា ខាងមុខនេះប្រទេសថៃនឹងមានរៀបចំការដង្ហែអង្គកឋិនទានមួយចូលវត្ត ស្វាយពពែ រាជធានីភ្នំពេញ ។ ទោះជាយ៉ាងណា លោកមិនបានធ្វើអត្ថាធិប្បាយជុំវិញការសោកស្តាយដែលបានសំដែងចេញ ដោយលោកឧបនាយករដ្ឋមន្ត្រីហោ ណាំហុង នោះ ទេ ។ លោកឯកអគ្គរាជទូត ថៃ បានអះអាងថា លោកនឹងជំរុញឱ្យមានការចុះហត្ថលេខាលើសេចក្តីសំរេចលើកលែងទិដ្ឋា ការសំរាប់អ្នកកាន់លិខិតឆ្លងដែនធម្មតា ហើយអាចនឹងសំរេចនៅក្នុងកិច្ចប្រជុំ APEC នាពេលខាងមុខនេះ ៕ ដកស្រង់ពី កោះសន្តិភាព
No comments:
Post a Comment