ពោធិ៍សាត់ ៖ ទំហំនៃការខូចខាតដោយសារគ្រោះអគ្គិភ័យកាលពីថ្ងៃទី២៤ ខែតុលា ឆ្នាំ២០១០ នៅផ្សារស្វាយដូនកែវ ភូមិស្វាយដូនកែវ ឃុំស្វាយដូនកែវ ស្រុកបាកាន ខេត្តពោធិ៍សាត់នោះ មានទឹកប្រាក់ប្រ មាណជា២១ម៉ឺនដុល្លារ និង៥១លានរៀល ម៉ូតូ២គ្រឿង រថយន្តវីហ្គោ១ និងសម្ភារៈជាច្រើនទៀតគិតជាប្រាក់ រាប់ម៉ឺនដុល្លារ។
លោកគុយ បូរ៉ា នាយប៉ុស្ដិ៍នគរបាលស្វាយដូនកែវ បានប្រាប់កម្ពុជាថ្មីឲ្យដឹងកាលពីព្រឹកថ្ងៃទី២៥ ខែ តុលានេះថា ទឹកប្រាក់នៃការខូចខាតនោះបានដឹងតាមរយៈម្ចាស់ផ្ទះ និងម្ចាស់តូបលក់អីវ៉ាន់ ដែលរងគ្រោះដោយសារអគ្គិភ័យ។ លោកបន្តថា អាជីវករបានរៀបរាប់អំពីប្រាក់ដែលខ្លួនមាននៅក្នុងផ្ទះសរុបមាន ចំនួន២១ម៉ឺន ៥ពាន់ ៨រយដុល្លារអាមេរិក និងប្រាក់ចំនួន៥១លាន ៤៧ម៉ឺន ៤ពាន់រៀល, ម៉ូតូចំនួន២គ្រឿង, រថយន្ត វីហ្គោ១គ្រឿង ចំណែកឯទ្រព្យសម្បត្តិ និងសម្ភារៈមិនអាចប៉ាន់ស្មានគិតជាតម្លៃនៃការខូចខាតនៅឡើយទេ។
លោកបន្តថា នៅក្នុងពេលគ្រោះអគ្គិភ័យកើតឡើង ក្រុមអាជីវករបានយកម៉ាស៊ីនគោយន្តចំនួន ១៥គ្រឿងបូមទឹកស្រះនៅជិតនោះបាញ់ទៅលើផ្សារឲ្យហៀរហូរ ទើបតូបខ្លះមិនត្រូវបានអគ្គិភ័យលេបត្របាក់។ លោកបានឲ្យដឹងទៀតថា កម្លាំងសមត្ថកិច្ចចម្រុះចំនួន៤១នាក់បានចេញប្រតិបត្តិការបាញ់ទឹក ពន្លត់៕
No comments:
Post a Comment