ថ្ងៃ សុក្រ ទី ១២ ខែ វិច្ឆិកា ឆ្នាំ ២០១០
រាជធានីភ្នំពេញ ៖ ក្រុមចោរកាំភ្លើងអាកា ដែលធ្វើសកម្មភាពប្លន់យកទ្រព្យសម្បត្តិតាមផ្ទះប្រជាពលរដ្ឋយ៉ាងកក្រើកកន្លងមមក ត្រូវបានកំលាំងប៉ូលិសនៃអធិការដ្ឋានខណ្ឌដង្កោ ចាប់ខ្លួនបានជាបន្តបន្ទាប់៤នាក់ ព្រមទាំងដកហូតបានអាវុធអាកា២ដើម និងកំពុងបន្តស្វែងរកចាប់ខ្លួនបក្សពួកដែលនៅសេសសល់ជាបន្តទៀត ។
ការចាប់ខ្លួនជនសង្ស័យទាំង៤នាក់នោះបានធ្វើឡើងរយៈពេល២ថ្ងៃមកហើយ ចាប់តាំងពីថ្ងៃទី១១-១២ វិច្ឆិកា ២០១០ នៅកន្លែងផ្សេងៗពី គ្នាដូចជានៅខេត្តតាកែវ ព្រៃវែង និងក្នុងមូលដ្ឋានខណ្ឌដង្កោ រាជធានីភ្នំពេញ ។ ការចាប់ខ្លួននេះគឺបន្ទាប់ពីគណៈបញ្ជាការឯកភាពកោះប្រជុំពង្រឹងសន្តិសុខ និងប្រកាសរង្វាន់៣ពាន់ដុល្លារ សំរាប់អ្នករាយការណ៍មុខសញ្ញាចោរប្លន់អាកា ។
ជនសង្ស័យជាក្រុមចោរប្លន់ទាំង៤នាក់នោះ សមត្ថកិច្ចពុំទាន់បង្ហាញពីអត្តសញ្ញាណនៅឡើយទេ គ្រាន់តែបង្ហើបឱ្យដឹងថា ការចាប់ខ្លួននោះគឺចំមុខសញ្ញាចោរកាំភ្លើងអាកាដែលតែងតែធ្វើសកម្មភាពប្លន់ប្រជាពលរដ្ឋយកទ្រព្យសម្បត្តិនៅតាមផ្ទះនោះហើយ ៕
No comments:
Post a Comment