នំពេញៈ លោករដ្ឋមន្ត្រីក្រសួងពាណិជ្ជកម្មកម្ពុជា បានឲ្យដឹងថា កម្ពុជាកំពុងរៀបចំផ្តល់អាជ្ញាប័ណ្ណរុករករ៉ែទង់ដែងចំនួន ១៣លានតោន នៅខេត្តសៀមរាប ក្នុងតំបន់អភិរក្សប្រវត្តិសាស្ត្រកម្ពុជា។
ក្នុងអំឡុងពេលថ្លែង សុន្ទរកថាទៅកាន់គណៈប្រតិភូចំនួន ៣៣រូបមកពីសភាពាណិជ្ជកម្ម និងឧស្សាហកម្មសិង្ហបុរី ចិន នៅឯសណ្ឋាគារឡឺរ៉ូយ៉ាល់ ក្នុងរាជធានីភ្នំពេញកាលពីថ្ងៃម្សិលមិញលោកចម ប្រសិទ្ធ រដ្ឋមន្ត្រីក្រសួងពាណិជ្ជកម្មបានឲ្យដឹងថា ការសម្រេចអនុញ្ញាតឲ្យរុករករ៉ែនៅតំបន់នោះគ្រោងធ្វើនៅសប្តាហ៍ ក្រោយបន្ទាប់ពីមានការប្រកាសអំពីប្រភពធនធានរ៉ែដ៏ច្រើននៅតំបន់ នោះ។
លោក មានប្រសាសន៍ថា ៖«នៅខេត្តព្រះវិហារ មានធនធានរ៉ែដែកជាច្រើន និង នៅសៀមរាប មានធនធានរ៉ែទង់ដែងជាច្រើន។ ធនធានទាំងនេះ មានចំនួនច្រើនជាងធនធាននៅប្រទេសឡាវ ៣ដងឯណោះ ពោលគឺ ១៣លានតោន ក្នុងរយៈពេល ៥០ឆ្នាំទៅមុខទៀត»។
លោកបានសង្កត់ធ្ងន់ថា បញ្ហាតែមួយគត់ គឺធនធានទាំងនោះ ស្ថិតនៅតំបន់ប្រវត្តិសាស្ត្រដែលត្រូវអភិរក្ស ហើយតំបន់មួយចំនួនទៀត មានអាយុប្រហេល ១ពាន់ឆ្នាំហើយៗអាចនឹងទទួលរងផលប៉ះពាល់ដោយសារការរុករករ៉ែ។
No comments:
Post a Comment