ថ្ងៃ អង្គារ ទី ២ ខែ វិច្ឆិកា ឆ្នាំ ២០១០
ខេត្ត បាត់ដំបង ៖ មន្ត្រីនគរបាលស្រុកភ្នំព្រឹកបានរាយការណ៍ថា យ៉ាងហោចណាស់មនុស្ស៣នាក់ រងរបួសធ្ងន់ និងម្នាក់ទៀតរងរបួសស្រាល ដោយសារបើកត្រាក់ទ័រកិនមីនតោន ដែលគេដាក់ត្រួតគ្នាចំនួន៣គ្រាប់ សេសសល់ពីសម័យសង្គ្រាម ហើយផ្ទុះយ៉ាងកក្រើកនៅចំណុចផ្លូវចាស់ (ផ្លូវក៥) ស្ថិតក្នុងភូមិភ្នំ៧ ឃុំចក្រី ស្រុកភ្នំព្រឹក កាលពីវេលាម៉ោង២និង២០នាទីរសៀល ថ្ងៃទី២ វិច្ឆិកា។
មន្ត្រីនគរបាលប៉ុស្តិ៍ចក្រីដែលបានទៅដល់ចំណុចកើត ហេតុ លោករិត សោភ័ណ្ឌ បានប្រាប់តាមទូរស័ព្ទពីតំបន់នោះមកថា ត្រាក់ទ័រម៉ាកហ្វត បានបើកជាន់មីនតោនផ្ទុះកក្រើកទ្រហឹង ហើយអ្នកជិះ និងអ្នកបើកបរសរុបចំនួន៤នាក់ បានប៉ើងខ្ទាតទៅតាមត្រាក់ទ័ររងរបួសធ្ងន់ និងស្រាល។ អ្នករងរបួសមាន១-ឈ្មោះឆេង ធា ភេទប្រុស អាយុ២៤ឆ្នាំ ជាម្ចាស់ត្រាក់ទ័រ របួសស្រាល ២-ឈ្មោះចិត្ត វីហាក់ ភេទប្រុស អាយុ២២ឆ្នាំ រងរបួសធ្ងន់ បាក់ជើងឆ្វេង និងដៃឆ្វេង ៣-ឈ្មោះចូត ខន ភេទប្រុស អាយុ២២ឆ្នាំ ដាច់ជើងទាំង២ និងដៃឆ្វេងផង និង៤-ឈ្មោះអ៊ីន ភេទប្រុស អាយុ២០ឆ្នាំ អ្នកបើកបរដាច់ជើងឆ្វេង រីឯត្រាក់ទ័រដាច់២កំណត់។
មន្ត្រីរូបនេះបានបញ្ជាក់ថា ត្រាក់ទ័រនេះ បានបើកចេញពីព្រៃតាមផ្លូវចាស់ (ផ្លូវក៥) ដែលជាផ្លូវមន្ត្រីស៊ីម៉ាក់ដាក់ស្លាកសញ្ញាហាមឃាត់ តែពួកគេមិនយកចិត្តទុកដាក់ ចំពោះគ្រោះថ្នាក់ដោយសារមីននេះ ហ៊ានបើកទាំងប្រថុយប្រថាន ទើបជួបគ្រោះថ្នាក់គួរឱ្យសោកស្តាយ។ បើពិនិត្យរណ្តៅគ្រាប់វិញ គឺមីននេះអាចដាក់ត្រួតគ្នាចំនួន៣គ្រាប់ ទើបបណ្តាលឱ្យត្រាក់ទ័រប៉ើងដាច់ជាពីរកំណាត់ និងមនុស្សរងរបួសធ្ងន់ធ្ងរបែបនេះ៕ ដកស្រង់ពី កោះសន្តិភាព
No comments:
Post a Comment