ភ្នំពេញ ៖ ព័ត៌មានថ្មីៗ ដែលកម្ពុជាថ្មីទើបទទួលបានពីមេទ័ពនៅជួរមុខប្រាសាទព្រះវិហារ កាលពីរសៀលថ្ងៃទី៥ ខែតុលា ឆ្នាំ២០១០នេះ បានឲ្យដឹងថា ទ័ពសៀមមួយចំនួន ត្រូវបានដកចេញពីខ្សែត្រៀមជួរមុខ នៃប្រាសាទព្រះវិហារកាលពីព្រឹកថ្ងៃនេះ។
លោកនាយឧត្ដមសេនីយ៍ ជា តារា បានមានប្រសាសន៍បញ្ជាក់ប្រាប់កម្ពុជាថ្មីថា កងទ័ពសៀមពិតជាបានដកចេញពីតំបន់ខ្សែត្រៀមជួរមុខប្រាសាទ ព្រះវិហារមែន ប៉ុន្តែលោកមិនបានបញ្ជាក់ពីតួលេខពិតប្រាកដថាកងទ័ពសៀមដកចេញ មានចំនួនប៉ុន្មាននោះទេ គ្រាន់តែបញ្ជាក់ថា ស្ថានភាពនៅព្រំដែនកាន់តែធូរស្រាលមែនទែន បន្ទាប់ពីជំនួបរវាងសម្ដេចតេជោ ហ៊ុន សែន និងលោកអាប់ភីស៊ីតនៅទីក្រុងញូវយ៉ក និងក្រោយមកទៀត ជំនួបនៅទីក្រុងប៊្រុចហ្សែល ប្រទេសបែលហ្សិក។
លោកជា តារា បានបញ្ជាក់ទៀតថា កងទ័ពសៀមដែលត្រូវដកចេញត្រូវបានបញ្ជាក់ថា នៅតាមព្រំដែន ត្រូវមានសន្តិភាព និងស្ថេរភាពឲ្យកាន់តែប្រសើរឡើងដូចពេលមុនៗ។
ទោះបីមេទ័ពខ្មែរលោក ជា តារា មិនបានបញ្ជាក់ពីតួលេខច្បាស់លាស់ថា ទ័ពសៀមដកចេញមានចំនួនប៉ុន្មាននោះក៏ដោយ ក៏ប៉ុន្តែមន្រ្តីជាន់ខ្ពស់ក្រសួងការពារជាតិកម្ពុជា បានប្រាប់ឲ្យដឹងថា ទ័ពសៀមដក ចេញមានប្រមាណជាង៣០រថយន្តធំៗ ដែលគេបានឃើញ។ ដូច្នេះ ទ័ពសៀមដែលនៅសេសសល់ នឹងដក ទ័ពជាបន្តបន្ទាប់ រហូតធ្វើឲ្យស្ថានភាពព្រំដែនប្រាសាទព្រះវិហារ និងតំបន់ជុំវិញឲ្យបានប្រសើរឡើងដូចមុនថ្ងៃទី១៥ ខែកក្កដា ឆ្នាំ២០០៨៕
No comments:
Post a Comment