រូប សំណាក់តារាសម្តែងភាពយន្តហុងកុង ប្រ៊ូស លី ត្រូវបានគេដាក់តាំងនៅលើដងផ្លូវ Avenue of Stars ក្នុងទីក្រុងហុងកុង ហើយថ្មីៗនេះ នៅប្រទេសចិនដីគោក រូបថត និងឈ្មោះរបស់តារាសម្តែងរូបនេះ ត្រូវបានប្រើប្រាស់នៅលើផលិតផលព្រោងព្រាត។ រូបថត Bloomberg
យោងតាមប្រព័ន្ធផ្សព្វផ្សាយរដ្ឋ បាននិយាយនៅថ្ងៃពុធ ទី០៣ វិច្ឆិកាថា ក្រុមហ៊ុនភាពយន្តចិន និងជនជាតិចិន កំពុងតែប្រើប្រាស់ឈ្មោះ និងរូបថតអតីតតារាសម្តែងក្បាច់គុនដ៏ល្បីល្បាញ លោក ប្រ៊ូស លី ដោយពុំមានសិទ្ធិអនុញ្ញាតពីក្រុមគ្រួសាររបស់តារាសម្តែងរូបនេះ ភ្ជាប់នៅលើវត្ថុគ្រប់យ៉ាងចាប់តាំងពីកញ្ចប់មី រហូតដល់ច្រាស់ដុសធ្មេញ។
កាសែតរដ្ឋចិន បានរាយការណ៍ថា ក្រុមមួយដែលត្រូវបានបង្កើតឡើងដោយ Sharon កូនស្រីរបស់តារាសម្តែងក្បាច់គុនរូបនេះ បានធ្វើការស្រាវជ្រាវ និងស៊ើបអង្កេតនៅទូទាំងប្រទេសពីការប្រើប្រាស់ឈ្មោះ លី ស៊ាវឡុង ឈ្មោះជាភាសាចិនរបស់លោក ប្រ៊ូស លី ធ្វើជាពាណិជ្ជសញ្ញានៅលើផលិតផលជាច្រើន។
នាង Sharon ត្រូវបានគេដកស្រង់សម្តីដែលបានថ្លែងថា ក្រុមហ៊ុនចិននានា និងបុគ្គលផ្ទាល់ខ្លួន ក៏បានប្រើប្រាស់ផងដែរនូវរូបថតតារាសម្តែង «Enter the Dragon» ដែលបានទទួលមរណភាពដោយសារស្ទះឈាមក្នុងខួរក្បាល នៅពេលអាជីពរបស់គាត់បានឡើងដល់កំពូលនៅឆ្នាំ១៩៧៣ ក្នុងអាយុ ៣២ឆ្នាំ។
សេចក្តីរាយការណ៍មួយនៅក្នុងកាសែត Southern Daily បាននិយាយថា នាង Sharon បានជួបពិភាក្សាជាមួយក្រុមមន្ត្រីនៅក្នុងទីក្រុងស៊ុនដេ ក្នុងខេត្តក្វាងទុង ភាគខាងត្បូងប្រទេសចិន ជាទីកន្លែងកំណើតនៃបុព្វបុរសកំពូលតារាសម្បែងក្បាច់គុន ប្រ៊ូស លី។
ទីក្រុងនេះ បានសាងទុកនូវសួនអនុស្សាវរីយ៍ដ៏ធំមួយ ហៅថា «ឋានសួគ៌លី ស៊ាវឡុង» ដើម្បីឧទ្ទិសដល់វីរភាព ជីវិតរស់នៅ និងអាជីពសម្តែងរបស់លោក លី ស៊ាវឡុង ។
សេចក្តីរាយការណ៍ បាននិយាយបន្តថា កូនស្រីរបស់លោក លី កំពុងតែស្វែងរកជំនួយពីរដ្ឋាភិបាលក្នុងតំបន់ ឲ្យប្រគល់ត្រឡប់មកឲ្យក្រុមគ្រួសារ និងមូលនិធិលោក ប្រ៊ូស លី វិញ នូវពាណិជ្ជសញ្ញាគ្មានការអនុញ្ញាតនោះ ដើម្បីថែរក្សាភាពស្របច្បាប់របស់អតីតតារាសម្តែងហុងកុងរូបនេះ។ ការអំពាវនាវរបស់កូនស្រីលោក លី ទៅដល់រដ្ឋាភិបាលក្នុងទីក្រុងស៊ុនដេ និងអាជ្ញាធរសុវត្ថិភាពទីផ្សារ មិនបានទទួលការឆ្លើយតបទេនៅថ្ងៃពុធ ទី០៣ វិច្ឆិកា។
យោងតាម កាសែត China Daily បានឲ្យដឹងថា រដ្ឋបាលចិនសម្រាប់ឧស្សាហកម្ម និងពាណិជ្ជកម្ម ដែលទទួលបន្ទុកការពារពាណិជ្ជសញ្ញា ថ្មីៗនេះ បានបញ្ជាក់យ៉ាងច្បាស់ថា ឈ្មោះរបស់អតីតតារាសម្តែងក្បាច់គុន ទាំងភាសាចិន និងភាសាអង់គ្លេស គឺជាកម្មសិទ្ធិរបស់ទាយាទលោក លី។
កាសែត China Daily បាននិយាយបន្តថា ទីភ្នាក់ងាររដ្ឋដដែលនេះ បានបញ្ជាថា ការដាក់ពាក្យស្នើសុំដទៃទៀតដើម្បីប្រើប្រាស់ឈ្មោះលោក លី ដែលបច្ចុប្បន្នកំពុងត្រូវបានដំណើរការ នឹងត្រូវបានគេច្រានចោល។
ច្បាប់ កម្មសិទ្ធិបញ្ញា មិនត្រូវបានគេគោរពឡើយនៅក្នុងប្រទេសចិន ដែលជាប្រទេសមានទីផ្សារលួចចម្លង និងក្លែងបន្លំធំបំផុតនៅលើពិភពលោក។
ក្រុមប្រឹក្សារដ្ឋរបស់ ប្រទេសចិន ឬគណៈរដ្ឋមន្ត្រី បានប្រកាសកាលពីខែមុនថា ខ្លួននឹងចាប់ផ្តើមនូវការបង្រ្កាបរយៈពេល ៦ខែមួយ ទៅលើការបទឧក្រិដ្ឋលួចចម្លងកម្មសិទ្ធិបញ្ញា ដែលចិននិយាយថា វាបានរំខានដល់សណ្តាប់ទូទៅរបស់ទីផ្សារ…និងធ្វើឲ្យគេឈ្មោះ ប្រទេសចិនអាក្រក់នៅឯបរទេស៕
ប្រែសម្រួល ឌិត សុខធី
