14-10-2010-o-ភ្នំពេញ ៖ ជ្រលងសម្ពាធទាប និងប្រព័ន្ធសម្ពាធទាបនៅតែបន្តគ្របដណ្ដប់លើផ្ទៃប្រទេសកម្ពុជា ដដែល រហូត ដល់ថ្ងៃទី១៨។នេះបើតាមការតាមដានស្រាវជ្រាវរបស់ក្រសួងធនធាន ទឹក និងឧតុនិយមហើយបានជូនដំណឹងបន្ថែម។
ក្រសួងធនធានទឹក និងឧតុនិយមបានជូនដំណឹងបន្ថែមនៅថ្ងៃទី១៤ ខែតុលានេះថា បន្ទាប់ពីធ្វើការតាមដាន ស្រាវជ្រាវពីធាតុអាកាស និងបាតភូតធម្មជាតិរួចមកឃើញថា មកដល់ថ្ងៃទី១៤ ខែតុលានេះជ្រលងសម្ពាធទាប និងប្រព័ន្ធសម្ពាធទាបដែលក្រសួងធនធានទឹកបានជូនដំណឹងកាលពីថ្ងៃ ទី១១ ខែតុលាកន្លងទៅនេះនៅតែបន្តគ្របដណ្ដប់ និងមានឥទ្ធិពលមកលើព្រះរាជាណាចក្រកម្ពុជាដដែល។
សេចក្ដីជូនដំណឹងបន្ថែមរបស់ក្រសួង ធនធានទឹក និងឧតុនិយមបានឲ្យដឹងថា ឥទ្ធិពលនៃជ្រលង សម្ពាធទាប និងប្រព័ន្ធសម្ពាធទាបនេះនឹងបន្តឲ្យមានភ្លៀងធ្លាក់ច្រើនចាប់ពី ថ្ងៃទី១៤ដល់ថ្ងៃទី១៨ ខែតុលាឆ្នាំ២០១០ នៅតំបន់វាលទំនាប តំបន់មាត់សមុទ្រពិសេសនៅតាមខេត្តមួយចំនួនដូចជា រាជធានីភ្នំពេញ កណ្ដាល កំពង់ស្ពឺ តាកែវ កំពង់ឆ្នាំង ពោធិសាត់ បាត់ដំបង សៀមរាប កំពង់ធំ ព្រះសីហនុ កំពត កោះកុង កែប ព្រៃវែង និងខេត្តស្វាយរៀង។
សេចក្ដីជូនដំណឹងបន្ថែមរបស់ ក្រសួងធនធានទឹក និងឧតុនិយមបានគូសបញ្ជាក់ថា ស្ថានភាពទឹកភ្លៀងដែលនឹងបន្តធ្លាក់ចុះនេះអាចនឹងបង្កឲ្យមាន ជំនន់ទឹកភ្លៀងនៅតាមបណ្តារាជធានី និងខេត្ត ទាំង១៤ដូចដែលបានជម្រាបជូនខាងលើ។
ក្រសួងធនធានទឹក និងឧតុនិយមបានអំពាវនាវដោយយោងតាមសភាពការណ៍អាកាសធាតុខាងលើ ឲ្យអាជ្ញាធរដែនដី និងប្រជាពលរដ្ឋដែលរស់នៅតាមបណ្ដារាជធានី ខេត្តខាងលើ ព្រមទាំងប្រជានេសាទ សមុទ្រសូមបន្តបង្កើនការយកចិត្តទុកដាក់ និងប្រុងប្រយ័ត្នឲ្យបានខ្ពស់បំផុត ដើម្បីចៀសវាងនូវរាល់គ្រោះថ្នាក់ផ្សេងៗដែលអាចកើតមានជាយថាហេតុ ៕
No comments:
Post a Comment